یاهو

هانچی گوزلین دهریده افسانه سی یوخدی

آردیندا مَلر عشقیله جانانه سی یوخدی؟

عالم دولا پروانه یله ، شمعیله یکسر

شمعِ رخوون بیز کیمی پروانه سی یوخدی

خال لَبیوی ائیله عیان،باشلا شکاره

صید ائیله کبوتر لری که دانه سی یوخدی

آچ زلفوی زنجیر کیمی حلقه به حلقه

بلکه دئمسینلر هانی؟دیوانه سی یوخدی

مخمورلرون باشینا داش دوشسون اگر که

گورسه او پریشان تِئلیوین شانه سی یوخدی

گلشن سارالیب،بلبلی مین درده سالیبلار

یوخ حَظی او گلزار، که ریحانه سی یوخدی

بیر مست ده شهر ایچره تاپیلمیر کی چیغیرسین

آیا بو دیارین نئیه میخانه سی یوخدی؟

ساقی گورسن هاردا یوباندی؟ دئنه یا رَبّ

چوخلار قالیب آواره اینان خانه سی یوخدی

هر یئر باخیرام نَشئه دی بیر عدهٔ مَخمورِ

جمعی که دایانماقدان اوتور شانه سی یوخدی

بیر عمر الینده دولی جامه ائدن عادت

نه حاله قالار گورسه کی پیمانه سی یوخدی

چوخدان دی گزیر شهری گوزوم،گورمورم اما

ذلت دی او شهر ایچره که مستانه سی یوخدی

میخــــــــــانه لری باغلیانین اَللّری سینین

ذاتینده خِلَل وار رَگِ مردانه سی یوخدی

ساقی؛ سنه کیم دل وئریب عالملری آتدی

هر کیمسه نین آیا سنی اولسا،نه سی یوخدی؟

#هاتف سنون عشقونده گزیر مست همیشه

زاهد بو صفانین نئیه آیا؟نه سی یوخدی

#هاتف_حضرتی
#امام_زمان_عج

یاهو

ای معنی سخاوت،دریای جود و رحمت

ای وارث امامت_لبیکَ یا مهدی

ای شیعه آبروسی،حاتم لر آرزوسی

ای معنی کرامت_لبیکَ یا مهدی

گل ای اورک صفاسی_سَسیزلرین صداسی

سال عالمه قیامت_لبیکَ یا مهدی

گلزارِ عشقه ریحان،جان مقدمونده قربان

گل قوی بو دهره منت_لبیکَ یا مهدی

باشدان باشا کرم سن،سن صاحب اِرم سن

وار گوزلرونده جنت_لبیکَ یا مهدی

سنسیز جهان نه لازم،یا تنده جان نه لازم

سنسن دلیل خلقت_لبیک یا مهدی

دیلده غمه دوزوم یوخ،والله آقا داریخدوخ

وئر خسته قلبه قوت_لبیکَ یا مهدی

ای فاطمه بالاسی،عاشقلرین آقاسی

قویما جهانی حسرت_لبیکَ یا مهدی

#هاتف_حضرتی
#امام_زمان_عج