Jizzaxda 14-yanvar – “Vatan himoyachilari kuni” nishonlandi

Oʻzbekiston Respublikasi Qurolli Kuchlari tashkil etilganligining 32 yilligi hamda 14-yanvar – “Vatan himoyachilari kuni” ni nishonlashga bagʻishlangan tadbir dastlab, Jizzax shahridagi "Xotira maydoni” da Jizzax viloyati hokimi boshchiligida tashkilot, idora rahbarlari va harbiy xizmatchilar ishtirokida “Motamsaro ona” haykali poyiga gul qoʻyish bilan boshlandi.

Bayram munosabati bilan  Vatan ravnaqi yoʻlida jon fido etgan shaxslar xotirasi yodga olindi.

Shundan soʻng, viloyat hokimligi “Anjumanlar saroyi” da bayram tadbiri boʻlib oʻtdi. Unda viloyat hokimi Ergash Saliyev soʻzga chiqib, bugungi bayram bilan harbiy xizmatchilar va ularning oila aʼzolarini samimiy muborakbod etdi.

Taʼkidlanishicha, harbiy xizmatchilar va ularning oila aʼzolarining ijtimoiy himoyalash borasida viloyat harbiy-maʼmuriy sektor “Yoʻl-xaritasi”ga asosan 2020-2024-yillar mobaynida mahalliy byudjet hisobidan jami 262 ta harbiy xizmatchilar uchun xizmat uylari qurilishi belgilangan boʻlib, shundan, 100 ta xonadonlar foydalanishga topshirildi, oʻtgan 2023-yilning oʻzida viloyat harbiy-maʼmuriy sektori tomonidan jami 8,4 mlrd. soʻm mablagʻ ajratilib, harbiy xizmatchilariga 64 ta xizmat xonadoni qurilib, foydalanishga topshirildi.

Bundan tashqari, 3 518 nafar harbiy xizmatchilarning oila aʼzolari “Sogʻlom avlod uchun” jamgʻarmasi mutaxassislari tomonidan tibbiy koʻrikdan oʻtkazildi.

“Biz bahodir va dovyurak harbiylarimiz bilan – oʻzining muqaddas qasamyodiga sodiq qolib, xizmat burchini yerda ham, koʻkda ham sharaf ila ado etayotgan yurtimizning zabardast oʻgʻlonlari bilan haqli ravishda faxrlanamiz”, deydi – viloyat hokimi Ergash Saliyev.

Viloyat hokimligi “Anjumanlar saroyi” da boʻlib oʻtgan tadbirda mahalliy va poytaxtdan tashrif buyurgan sanʼatkorlar tomonidan tayyorlangan kuy-qoʻshiqlar ijro qilindi.