یاهو

چون آئینه با جفایِ سنگ مشکل دارم

بشکسته دلی که با خَدنگ مشکل دارم

از کودکی ام هراسم افتاده به جان

با واژهٔ #کوچه_های_تنگ ،مشکل دارم

#هاتف_حضرتی
#حضرت_زهرا_س
#امام_حسن_ع

یاهو

کیم دئیور فاطمه نین یوخدی بو یثربده کسی

خلوتینده واریدی نئچه گوزل همنفسی

ایکی یولداش کیمی درده آلیشاردی زهرا

داریخاندا یارسیلان دانیشاردی زهرا

خانیمین سینه سینی بیر گئجه ترک ائیله مدی

هئچ کسه فاطمه نین دیلده کی دردین دئمه دی

دوزدی یاره یدی،اگر اوندا ترحم یوخودی

ولی همسایه لریندن که وفاسی چوخودی

بیر نفر گلمه دی زهرا غمینه یار اولسون

لااقل سقط اولونان محسینه غمخوار اولسون

خانیمین دردینی رسمیله خانیم یاخجی بیلَر

بعضی غملرده خانیم گوز یاشین البته سیلَر

ولی زهرا ائله غرق اولدی او بحران ایچره

چاغیریب فضه نی تا گوردی اوزون قان ایچره

فاطمه زخمیله ئولمزدی،وفادن ئولدی

بینِ دیوار و در اول لحظه حیادن ئولدی

#هاتف_حضرتی

یاهو

علی نین قلبینی سیخسوز،آچیب باش قلبوزی دَلَّلم

هارا چکسوز اونی منده سینان پهلوئیله گَلَّلم

آچون تئز اللرین ایندی منیم روحوم چیخار تندن

علی نی بوشلیون هرنه حسابوز وار آچون مندن

علی جان،دلبریم،روحوم،اوجا دوت باشیوی عشقیم

منیم قاخمیر الیم تئز سیل اوزون گوز یاشیوی عشقیم

اگر سن شمعِ عرفان سان منی پروانه فرض ائیله

سن اول ساقی منی می دن دولی پیمانه فرض ائیله

رهِ عشاقیده روحِ وفا پیکردن آیریلماز

گورن بیلسین ئولر زهرا،ولی حیدردن آیریلماز

خیال ائیلیر بو ملت من خزان ویرمیش گل زردم

آدیم عورت دی،غیرتده ولی هر مردی دن مَردم

بولار اوچ یوز نفر گلسین غلاف و تیغی اللرده

منیم بیر معجریم بسدی،سالا بیر عالمی درده

#هاتف_حضرتی
#حضرت_زهرا_س

یاهو

بعد از دفن حضرت زهرا س

غرض دریای حِلم الله،یَمِ حِلمانی دفن ائتدی

قازیب اوز صَبرینین قبرین،ولی زهرانی دفن ائتدی

غبارین سیلکییب قبرین اللیندن،غم باشا چیخدی

الینده وار یوخون دفن ائیلییب الّلر بوشا چیخدی

دئدی زهرا گوروب خَیر والوَرانی ایندی دینجلدون؟

ائدیب بی کس عَلیّ المُرتضیٰ نی ایندی دینجَلدون؟

بیر اللّی هی قنوتونده دُعاوین حاجتین آلدون

خلاص اولدون اوزون اما،منی گور نه گونه سالدون

همان حیدر کی تیترَردی ایاقی آلتدا یِئر گویلر

قالیب ایندی ائله حاله که سنسیز بیر ئولوم ایستَر

اولان اولدی منه،سنده یانیبسان منله بو اوتدا

یاتیب توپراقلار آلتیندا ائویمی ییخمیسان زهرا

فدا ایثاریوه،غمده منه سینه سپر اولدون

منه گلمیشدی درد و رنج سن مندن بَتَر اولدون

سنی میخِ در و آتش،منی بو صحنه یاندیردی

چاغیردون فضه نی گوردوم،منی بو سَس اوتاندیردی

بو دوقّوز ایلده بیر دفعه خجالت ائتمه دون زهرا

ییغیب بیر یئرده آخر لحظه تابوت ایسته دون زهرا

سنه گهواره قولی وئردیم عکسه دوندی بو باره

مُحیا ائتدی تابوتون همان اسبابِ گهواره

گرک سندن صورا لطفِ جهانی بوشلییام زهرا

ئولونجه من سنه بیر زندگالیق بوشلییام زهرا

سیخلمیش قلبیمی آرتیق غمیله سیخدیلار نئیلیم

سنی مندن آلیب آخر ائویمی ییخدیلار نئیلیم

اولان اولدی،یانان یاندی،فقط رفعِ ملال ائیله

ائویمده اینجیدون زهرا منی دیلدن حلال ائیله

سنی تاپشیردیغیم توپراقه آماجِ غبارم من

یانان کاشانه مه دور گور نه نوعی رَه سپارم من

منیم احوالیمه ایندی قرا گونده فلک آغلار

منی بو حالیله گورسه قیزون زینب اگر دیغلار

گئدیم هانچی ائوه؟بیر ائو کی سن سیز قاتلِ جاندی

منه سنسیز هله ائو هئچ،بو دنیا کلی زندان دی

بیر ائو کی خاطراتونله دوزولموش خشتی خشت اوسته

وجودونله سنون اقدم گلردی مین بهشت اوسته

بیر ائو کی هر وجب ده مین گولوش دفن اولدی ظلمیله

حسادت اللریله گلشنِ عشقیم اود ایچره سولدی ظلمیله

بو ائودن ظلم اَلی هر خاطرِ دیرین لیغی آلدی

سنی آلدی،منیم ائودن اولان شیرین لیغی آلدی

گئجه یاری بو قبر اوسته اوتورماز مرتضی بیجا

نه سندن اَل اوزه بیلَلم،نه دیز وار گئدماغا زهرا

ولی گوزلور بالالاریم ائویمده قلبی بشکسته

گرک دیز گلمسه نئیلیم،گئده م حتی اوزوم اوسته

من ایندی اولماسام ائوده،اولار اشکیله ائو دریا

هامیسی بیر طرف اما،حَسن حتما ئولَر زهرا

گلنده کوچه ده گوردوم،که بیر یرده غمه دولدی

نَنم وای سَسله دی آرام،اَل اوزده گول کیمی سولدی

بوکولدی دیزلری،آه و فغانی دیلده لمس اولدی

بیر اَل اوزده بیر ال دیواریده،اشکیله گوز دولدی

اورکدن رنگ اندوهین گئدیب ائوده سیلیم زهرا

آلیب گویلون نوازش له،گرک دردین بیلیم زهرا

بو نئچه گون آغیر سوز گوزیاشیندا گورموشم زهرا

هله تل تل آغارمیش مو باشیندا گورموشم زهرا

فدک جریانینه سنله گلَندن غم سارالدیبدی

نه غم وار بیلمیرم دیلده اونی بئیله قوجالدیبدی

#هاتف_حضرتی
#حضرت_زهرا_س