Китобнинг зўри https://tttttt.me/turkiston_kutubxonasi/3284

Қачондир шундай кунлар келади — Ўзбекистон Сенати, масалан, 5 июль куни имзолаган қарор ҳақида ўзбекистонликлар шу 5 июлнинг ўзида тўла, батафсил хабар топади. Марказий банкнинг 13 июлдаги хабаридан бир кун ўтиб, қарорда айтилган нарса рўй беришига бир кун қолганида, орадан ўн кун ўтиб эмас. Ишонаман, шундай кунлар албатта келади. Чунки 10 йил аввал ҳозирги кунлар ҳам армон эди — 5 июлдаги қарор 35 июлда ҳам эълон қилинмасди.

Ишончим комил, Сенатимиз 5 июлда қабул қилган қарорини 5 июлда эълон қилишни ўрганиб олгач, кутишнинг янги босқичига ўтамиз — ундан кейин, қачондир, шундай кунлар келадики, Сенатимиз мажлисларида кўриб чиқиладиган ҳар қандай лойиҳа/ҳужжат матни ўша кўриб чиқилаётган куниёқ эълон қилинади, «ия, Сенат тасдиқлаган қонун матни кучга киргунича ўзгариб қолибди», деган хунук ҳолатлар буткул, қайтмас бўлиб тарихда қолиб кетади.

Ишончим комил, ўша кунларда Қонунчилик палатамиз ҳар бир қонунчилик ташаббуси ҳақида тўлақонли ахборот берадиган, масалан, Тикток ва Твиттер каби ижтимоий тармоқларнинг блокланиб қолишига сабаб бўлган қонун лойиҳаси кимнинг ташаббуси эканини, бу қонун талабларини бажараётган давлат идорасига Твиттерни блокдан чиқариш ҳақидаги хат билан мурожаат қилган депутат ва бошқа депутатлар қонунни қабул қилиш вақтида қандай овоз берганини кўрсатадиган, қабул қилиниб, Сенатга йўлланган қонунларнинг матнларини қабул қилинган куниёқ эълон қиладиган тузилмага айланади.

Биз кўрамиз шу кунларни, Худо хоҳласа.

Катта тадбирларимизнинг катта харажатлари ҳақиқатан ҳам қизиқ мавзу — нархномаларини кузатиб, бир бошқача бўласан, худди бировнинг чўнтагидаги пулни ҳисоблашдек бир завқ ҳам беради-да энди бу. Ўзинг кўрган бу завқли (ва баъзан оғриқли) маълумотларни бошқаларга ҳам осон хазм бўладиган кўринишда улаша олсанг — завқнинг даражаси яна бир карра ошади (тўғри тушунасизлар, касб касаллиги бу).

Қайсидир бир катта тадбирдан кейин, ДХарид порталидан уни ўтказишга кетган харажатлар миқдори топилгач (ўшанда буни биз эмас, шу портал ичида яшайдиган блогерларимиз топишганди), биз “Дарё”да (ўша вақтда “Дарё”да ишлардим) нимага қанча харажат кетганини суратлар ёрдамида осон тушунтирадиган бир нарса қилмоқчи бўлгандик. Бошлагандик ҳам — қуйидаги сурат ўша тадбирнинг бир қисми ҳақида — лекин кейин... “дух”имиз етмаганди. Қўрққандик-да ўшанда. Анча аввал бўлган воқеа бу. Ҳозир замон бошқа.

Ўзи нега буни эслаб қолдим? Давлетовуз тунов куни Тошкентдаги инвестиция форумини ўтказиш учун қанча пул сарфланганини бир рўйхат қилиб берганди-ку. Ундаги рақамларни кўрсанг, тўғри, одамга бироз алам қилади — ахир оз эмас, кўп эмас, нақ 15 миллиард кетган. Масалан, қимматбаҳо машиналар ижараси учун 2 миллиард, байроқлар ижараси учун эса салкам 400 миллион сўм. Лекин, “шунга яраша келган меҳмонлардан ҳеч бўлмаса бирор 150 миллион доллар ундиришган бўлса, ҳай”, дегандим (текшириш имкони йўқ маълумотларга кўра, камида 7 миллиард доллар ундиришибди).

Лекин кеча кечаси шу тадбир ҳақида Газета.узда чиққан каттароқ материални кўриб,.. юмшоқ қилиб айтганда, ҳ... айрон қо(и)лдим. Масалан, бир порция тўй ошини 130 минг, битта сомсани 70 минг, бир дона мини (МИНИ!) мантини 50 минг сўмдан ўтказишибди. Қизиқ, порцияси 130 минг сўм бўлиши учун ош қанақа гуручдан тайёрланиши керак? 70 минг сўмлик сомса қайси ҳайвоннинг гўштидан тайёрланади, қизиқ. Эҳтимол, сомсапаз Гонконгдаги 68 миллион долларлик пентхаусларга хизмат кўрсатадиган супер-олий-космос тоифалидир, ким билсин.

Шунча харажат қилишибди-да, лекин охирида майдароқ, кичикроқ хизмат кўрсатувчи корхоналарнинг иш ҳақини беришмабди, айтишларича. Ким билсин, балки бу корхоналарнинг эгалари ва эгаларининг орқаларидаги эгалари ҳам кичикроқ одамлар бўлгани учундир. Балки бу корхоналар ўз хизмат ҳақига бир порция ошнинг нархини 130 минг сўмга чиқарадиган асосий масаллиқ — виждонининг ҳам баҳосини қўшиб ҳисоблаб беролмагани учун шундай бўлгандир (гарчи бунга ишониш қийин бўлса-да). Балки айнан бир коса палов 130 минг сўм бўлгани учун уларга пул етмай қолгандир. Ким билсин, ким билсин.

Расмда — аввалги йилларда бўлган бир катта тадбирнинг фақат гулли безакларига кетган харажатлар сомалича усулда оддий тушунтирилган

Бир дўстим мендан беш юлдузли (балки юлдузлари ундан ҳам кўпроқдир, билмадим) Ҳилтон меҳмонхонасида, масалан, бир порция ошнинг порцияси 130 минг, мини манти эса 50 минг сўмдан тортилганига ҳайрон бўлмасликни сўради. Унинг айтишича, бу нархлар бундай меҳмонхона учун нормал экан, ҳатто “анча инсоф қилишибди”.

У буни Ҳилтоннинг 21-қаватидаги ресторан менюсидан келиб чиқиб айтяпти: масалан, у ерда баҳорий салат 120 минг сўм экан; салат 120 минг сўм бўлгач, ош ундан қимматроқ, нархи 130 минг сўмдан ҳам юқори бўлиши мантиқан нотўғри эмас. Ёки гўштсиз боршч бор экан ўша ресторанда, 80 минг сўмга. 50 минг сўмлик мантида, у мини бўлса ҳам, гўшт бор лекин, дейишди.

Ҳай. Дарвоқе, бу меҳмонхона солиқ имтиёзларига эга эканлигини муаммо (ҳатто “қонунбузарлик”) дейишди. Лекин ўйласанг яна қўрқасан — агар шу имтиёзлар бўлмаганида, бир порция ошнинг қиймати 130 минг бўлмаслиги аниқ эди.

«Нев-Йорк кўчаларида неча минглаб очлар гадойлик қилиб юрадилар. Кечаси ишсизлар эрта биланги пулсиз нонуштани олиш учун узун навбатга тизиладилар». Бу 1932 йил 28 июнь куни «Қизил Ўзбекистон» (кейинчалик номи «Совет Ўзбекистони», «Ўзбекистон овози» бўлиб ўзгарган) газетасида босилган хабар. АҚШда бепул нонушта учун турнақатор навбатлар ҳар доим бўлган — 90 йил аввал ҳам, 60 йил аввал ҳам, 30 йил аввал ҳам, ҳозир ҳам. Совет матбуоти фақат шу турнақатор навбатлар ҳақида ёзган. Афтидан, Фарғонада ўша совет матбуоти қолдиқлари ҳали ҳам сақланиб қолган.

Азиз асримизнинг журналистикада, медиада ишлагиси келаётган азиз ёшлари, ёзинглар https://tttttt.me/nugmanovlive/208

Қизилда ўтиб, буви ва неварани уриб кетган (буви ўлган, невара деярли ногирон) автобус ҳайдовчиси 5 йилга қамалибди. Ҳайдовчининг онаси жабрланувчилар келишишса бўларди, одаммиз-ку, деяпти (ҳай она-да, болам қамалмасин дейди).

Аламлиси, катта эҳтимол билан қизил чироққа биринчи марта ўтмаган бу каби ҳайдовчилар аксарият ҳолларда биринчи марта судланган фуқаро сифатида бир йилга қолмай амнистияга тушади. Жуда шафқатсизлик қилаётгандирман, аммо қизил чироққа ўтиб, одам уриб кетган одамнинг Жиноят кодекси 97-моддаси билан судланадиган қотиллардан фарқи йўқ, менимча. Автобус ҳайдовчиси экани эса оғирлаштирувчи ҳолат сифатида қабул қилинса ҳам бўлади. 5 йил кам, умуман амнистияга тушмаслиги керак бундай ҳайдовчилар.

Бир гап тўғри — яхши ҳам жиноят қонунчилигига таъсирим йўқ. “Болам йўлдан ўтишга, автобуслардан қўрқиб қолди”, деган гапни эшитганингда қонинг қайнайверади лекин.

Қорақалпоғистондаги воқеалардан сўнг Конституцияга киритилаётган ўзгартишлар муҳокамаси сал сустлашиб қолди, шунгамикин, муҳокамалар учун ажратилган муҳлатни иккинчи марта — 1 августгача узайтиришди. Киритилаётган ўзгартишларнинг тўлиқ рўйхати эълон қилинган вақти акам Каинбек эътиборни “ушбу Конституциянинг фалон моддалари қоидалари қайта кўриб чиқилиши мумкин эмас” деган биз учун мутлақо янги нормага қаратганида, гап нима ҳақида кетаётганини ўшанда яхши тушунмагандим.

Шундай қилиб, амалдаги Конституциямизнинг 127-моддасини қуйидаги таҳрирдаги иккинчи қисм билан тўлдириш таклиф қилинган: “Ушбу Конституция 1-моддасининг ва ушбу моддаси иккинчи қисмининг қоидалари қайта кўриб чиқилиши мумкин эмас”. Янги таҳрирдаги 1-моддада эса шундай дейилади: “Ўзбекистон — суверен республика, ҳуқуқий, ижтимоий, дунёвий, демократик давлат. Давлатнинг ‘Ўзбекистон Республикаси’ ва ‘Ўзбекистон’ деган номлари бир маънони англатади”.

Нима дегани бу? Ҳозир Конституциямизнинг исталган моддасини қайта кўриб чиқиш, хоҳлаганча ўзгартириш мумкин. Ақл бовар қилмаса-да, масалан, 67-моддадаги “Цензурага йўл қўйилмайди” деган қоидани мутлақо тескарисига алмаштириб қўйса ҳам бўлади (бу таклифни парламентимизнинг учдан икки қисми ёки референдумда халқ қўллаб-қувватласа, мабодо). Лекин 127-моддага киритиш таклиф қилинаётган ўзгартиш тасдиқланса, у ҳолда Конституциямизда илк бор умуман ўзгармайдиган нормалар пайдо бўлади.

Биринчи эшитганда қулоққа ғалати эшитилади ҳақиқатан: Ўзбекистон. Конституциясида. Ҳеч қачон. Ўзгармайдиган. Қоидалар. “Наҳотки Ўзбекистонда ҳам ўзгармас, ўзгартириб бўлмас қонунлар бўлса?!”, деган истеҳзоли савол туғилиши табиий. “Параллел Ўзбекистонда бўлиши мумкину, лекин бизникида эмас”, дейиши мумкин яна кимдир. Лекин жиддий қаралса, менимча, ҳар 10—15 йилда ҳамма ўрганиб қолган катта ўзгаришларни қилишни яхши кўрадиган Ўзбекистондек мамлакат учун катта янгилик бу.

“Ҳар 10—15 йилда катта ўзгаришлар қилишни яхши кўрадиган” деяпману, лекин, менимча, бу каби ўзгаришлар ҳар сафар кўп эҳтиёткорлик билан, имкон қадар асослари келтирилиб, яхшигина хавотир остида амалга оширилган. Яъни, халқнинг норозилигини қўзғашдан ҳайиқиш бўлган. Ким билсин, айнан шундай ҳушёр этувчи норма бўлганида, “ҳар 10—15 йилдаги ўзгаришлар” ҳам бўлмасди, эҳтимол. Шу жиҳатдан, балким, 127-модданинг таъсир доирасини кенгайтириш ўринли бўлар.

Мисол учун, Туркия Конституциясининг 4-моддаси унинг 1—3-моддаларни тузатиш ё ўзгартириш мумкин эмаслиги ҳақида. Дастлабки уч модда, масалан, Туркиянинг дунёвий республика, давлат тили турк тили, пойтахти Анқара-ю, байроғи қизил фондаги ярим Ой ва юлдуз экани ҳамда Отатурк йўлига содиқлиги ҳақида. Яъни, Эрдўғон қанча хоҳласа ҳам, шу моддаларни ўзгартира олмайди. Бизда таклиф этилаётган янги 127-модда ҳам Ўзбекистоннинг ҳар вақт дунёвий давлат бўлиб қолишини кафолатламоқчи.

Бошланишига ёки умуман шунинг ўзи ҳам етар, ким билсин. Лекин, мабодо хоҳиш бўлса, 127-модданинг таъсир доираси билан Конституциямизнинг шу вақтгача энг кўп ўзгартиш киритилган моддалари ҳам қамраб олинса, фойдадан холи бўлмас, балки. Энди, бу ҳам бир таклиф-да. Шунда, эҳтимол, келгусида конституциявий ислоҳотларга ортиқ эҳтиёж сезилмас.

Лазизнинг қонга ботирилган жадидлар ҳақидаги фильмини кўрдим. Улар ҳақида ҳикоя қилинаётганида, масалан, Ғафур Ғуломни лойга ботириш янгиликмасу, аммо унинг ёнига Ўзбекистон тупроғида олтин гуллашини кашф қилган Ойбекнинг қўшилгани мен учун янгилик бўлди. Яна, фильмни кўргач, 4 октябрни ҳам яна бир умуммиллий хотира кунига айлантириш керак, деган чорлов қулоқ остида жаранглаётгандек. Тўғри, 31 август — Қатағон қурбонлари хотираси куни бор, лекин миллат билан юз берган ҳақиқий даҳшатни негадир 4 октябрда кучлироқ ҳис қиласан. Ҳар ҳолда кадрлар, мусиқа, интервью берувчиларнинг сўзлари миянгга шу ғояни ураверади.

Лазиз бу фильм билан нафақат каттароқ мавзуда бутунроқ контент тайёрлай олишини, балки ўзи раҳбарлик қилаётган студиянинг имкониятларини ҳам кўз-кўз қилгандек (юқоридаги видео Лазизнинг охирги фильмидан кесиб олинган — зўр-ку, тўғрими?). Яхшироқ сценарий топиб, «Персеполис»ми, «Башир билан вальс»ми, шуларга ўхшаш бирор мультфильм олинглар энди, дедим. Канн-паннда ютиб қолармиз биз ҳам.

"Бир кило пахтанинг пули бир литр дизелга ҳам етмаяпти"

Kommers.uz'нинг ёзишича, Uzbekistan GTL товар-хом ашё биржасига дизель маҳсулотини чиқармаяпти. 19 июль куни Бухоро нефтни қайта ишлаш заводи ҳам биржа савдоларига дизель чиқармаган.

Нашр дизель ёқилғиси ошганидан норози фермерлар билан мулоқотда бўлган. Айрим иқтибослар:

"Эрта баҳорда 8-8,5 минг сўмдан олганмиз. Ҳозирги кунга келиб, қўлда сотиладиган дизель 13 минг сўм, энг арзон, сифатсиз ва яроқсиз дизель 12 минг сўм, ‘заправка’ларда эса маҳсулот нархи 14-15 минг сўмни ташкил этмоқда. Бу нарх биз фермерларнинг шароитига умуман тўғри келмайди".

"Ушбу муаммолар Президентимизга етиб борса, натижа албатта кўзга кўринади. Лекин давлат раҳбари бехабар бўлса, фойдаси йўқ. Барча масъул раҳбарлар нарх-навони билиб турибди".

"Биз пахта экилганида далага 8-10 марта ишлов берамиз. Нархлар баланд бўлгани учун бу ҳам қисқартириб ташланди — 5 марта ишлов беришга ўтдик".

"Биз ҳамма маҳсулотни биржа нархида сотиб оламиз. Лекин кластерлар пахтамизни биржа нархида олмайди, ўзлари нарх-наво қўйиб, бизга ўзимиз етиштирган маҳсулотга эркин нарх белгилашимизга имкон бермайди. Пахтамизни биржа нархига ўтказиш керак, шунда адолатдан бўлади.

Мисол учун, шунда биржадан дизель олсак ҳам қийналмаймиз. Илгари бир килограмм пахтанинг пулига икки литр бензин олардик. Ҳозир эса бир кило пахтанинг пули бир литр дизелга ҳам етмаяпти".

Қишлоқ хўжалиги соҳасидада фаолият юритасизми? Фермерсиз, лекин назарий билимилар камлик қиляптими? Унда Фермерлар мактаби айнан сиз учун!

Айни пайтда Фермерлар мактаби 7-мавсумига қабул жараёнлари бошланди. Ариза топшириб, суҳбатдан муваффақиятли ўтганлар ўқув курсида малакали мутахассислардан билим ва кўникмалар олиш имкониятига эга бўлишади.

Йўналишлар:
✅Чорвачилик;
✅Паррандачилик;
✅Сабзавот ва полизчилик;
✅Иссиқхона хўжалиги;
✅Узумчилик;
✅Бизнес, молия ва ҳуқуқий саводхонлик.

Батафсил маълумот ва ариза топшириш учун:
Telegram-бот: @fermerlar_maktabi_bot
Сайт: fermermaktab.uz

Телефон:
+998955008010
+998955008001
1216

Реклама

Шу ашулани яхши кўраман (Линкин Паркни яхши кўрмай бўладими). Клипи ҳам яхши.

Бир-икки эътиборга молик жаҳон хабарлари:

1. Бунга ишониш қийин, лекин бу нарса ҳақиқатга айланишига оз қолди: Британия бош вазирлиги учун пойга финалига келиб чиқиши панжоблик (ҳиндистонлик) Риши Сунак ҳам чиқибди, финалда унга рақиблик қиладиган Лиз Трассдан ҳам кўпроқ овоз тўплаб. Кимга қанақа, билмадиму, лекин менимча даҳшат — бунинг ёмон жойи йўқ, аммо тасаввуримга эрк берсам, ҳаяжонланиб кетяпман: демак, қачондир келиб чиқиши панжоблик (бу сафар Ҳиндистондагиси эмас, Ўзбекистондагисини назарда тутяпман) бир одам Россиянинг раҳбарига айланиши мумкин-да, бир тасаввур қилиб кўринг. Ҳай, биз кўрмасмиз у кунларни, унгача Россиянинг географияси ҳам ўзгариб кетар, лекин қизиқ бўлади.

2. Лавров ярамас Путин Россиясининг асл нияти, асл башарасини кўрсата бошлабди — «географик мақсадларимиз ўзгарди, бизга энди фақат Донбасс эмас, ундан нариси ҳам керак, уларни ҳам оламиз», деяпти (Шпакнинг магнитофонини олсанг-чи ундан кўра, дейдиган одам йўқ). Мана шу ярамас 24 февралгача «биз Украинага бостириб кирмаймиз», деб кариллаб келганди. Дарвоқе, агар ҳар доим у айтган гапнинг тескариси бўладиган бўлса, унда вазият унчалик ҳам ёмон эмас экан.

3. Бу видеони кўриб мазза қилдим, Медуза боплайди-да — шунақа «кичкина хурсандчиликлар»га хурсанд бўлиб юрибмиз: https://youtu.be/Y7WL7XDcmsc

Ўзбекистонлик русийзабон медиа мутахассислар охирги йилларда кашф этган факт. Ўтган йили “Дарё”га XXI асрда туғилган, инглиз тилини зўр биладиган, лекин русча (баъзан — умуман) тушунмайдиган йигит-қизларни ишга олаётганимда мана шундай кашфиёт қилгандим ман ҳам, аммо бу кашфиётимни англагунимча уларга ҳар доим: “Русчани билмасанг, инглизчани қандай ўргангансан?”, деган ғалати савол берганман — ҳозир инглизчани (нафақат инглизчани) яхши ўрганиш учун рус тилини билиш шарт эмас экан, бунақа амалиёт 15–20 йил олдинги замонда қолиб кетган экан. Ўзбек тилини билсанг бас. Бу — ажойиб ва зўр!